Првиот човек на светскиот фудбал беше на удар на критики во изминатата година, особено во Европа, бидејќи предложи Светските првенства да се одржуваат на секои две години наместо на секои четири.

Претседателот на Меѓународната фудбалска федерација (ФИФА), Џани Инфантино на Конгресот на ФИФА во Доха кажа дека светската фудбалска куќа никогаш не предложила организација на Светското првенство за две години.

Но, Инфантино денеска ги информираше светските фудбалски лидери дека ФИФА никогаш не предложила потег што се заканува да го подели фудбалскиот свет.

– Да бидам јасен, ФИФА не предлага Светско првенство на секои две години. Да се ​​разјасни процесот. На последниот Конгрес 88 отсто гласаа за проучување на изводливоста на овој и на некои други проекти. Раководството на ФИФА на чело со Арсен Венгер го направи токму тоа. Ја проучувавме изводливоста. Но, ФИФА не предложи ништо. ФИФА дојде до заклучок дека тоа е изводливо, но дали ќе има некакви последици и влијание – вели Инфантино.

Како што е познато, следниот Мундијал ќе се одржи годинава од 21 ноември до 18 декември во Катар, а следното СП 2026 ќе се организира во три земји: Канада, Мексико и САД.