Хари Кејн брзо ја сфати разликата помеѓу Баерн и Тотенхем
Хари Кејн (30) летово го напушти Тотенхем за да се бори за своите први големи трофеи во кариерата и се чини дека не можеше да избере подобар следен клуб.
Го засили славниот Баерн, веднаш покажа дека е големо засилување, а воедно не му требаше многу за да ја сфати разликата меѓу двата клуба.
– Во Баерн има многу поголем притисок од она на кое сум навикнат. Се разбира, во Тотенхем сите сакавме да победиме, но ако не го направивме тоа на неколку натпревари, никој не мислеше дека тоа е катастрофа – рече Кејн.
Сега сè е поинаку во германскиот Минхен.
– Во Баерн треба да се победи на секој натпревар. Во првите два натпревари победивме со 4:0 и 3:1, но луѓето сè уште зборуваат дали игравме добро. Тоа е дел од овој клуб, затоа е еден од најголемите во светот – вели англискиот репрезентативец.
Кејн моментно се наоѓа во Вроцлав, Полска, каде Англија денеска од 18.00 часот ќе игра против Украина во квалификациите за Европското првенство 2024.