Специјалниот пратеник на претседателот на САД за дијалогот на Косово и Србија, Ричард Гренел изјави вечерва во Приштина дека посетата на високата делегација на неговата земја на Косово е доказ на посветеноста кон оставрувањето на договорот од Вашингтон, јавува Бета.

„Дојдовме да докажеме посветеност кон договорот за економска нормализација. Знаеме дека во минатото многу му се ветуваше на Косово и сакаме да се заложиме дека примената на договорот ќе биде продолжена“, рече Гренел по состанокот со премиерот на Косово Авдулах Хоти.

Рече и дека администрацијата на претседателот Трамп не сака празни зборови.

„Сакаме да му покажеме на народот на Косово, кој е наш сојузник, дека сме со вас. Сакаме да помогнеме во отворањето на работни места за да ги надминеме старите политички прашања“, рече тој.

Косовскиот премиер Авдулах Хоти оцени дека посетата на американската делегација на Косово ја открива „одлучноста и сериозноста на Трамп и сите негови соработници за остварување на договорот“.

Хоти рече на состанокот дека поопширно е разговарано за сите точки на договорот.

„Чест ми е да кажам дека брзо ќе тргнат кон спроведување на овој договор. Создаден е нов замав“, рече премиерот Хоти.

Извршниот директор на Американската корпорација за финансирање на меѓународниот развој Адам Белер рече дека со оваа посета ја покажуваат својата сериозност кон потенцијалните инвестиции и пружањето поддршка на пријателите на Косово.

Тачи го одликуваше Гренел

Косовскиот претседател Хашим Тачи го одликуваше вечерва специјалниот пратеник на американскиот претседател Доналд Трамп, Ричард Гренел со претседателски медал за заслуги.

Тачи на својот Фејсбук профил објави дека тоа го направил, ценејќи го придонесот на Гренел кон дијалогот меѓу Белград и Приштина, пренесува Газета Експрес.

„Она што другите не го направија, Гренел го направи брзо и добро. Договорот од Белата куќа ќе донесе мир и стабилност на Косово и во регионот“, рече Тачи.

(Бета)