Голема трагедија во Хрватска се случи во понеделникот во вечерните часови, кога животот во Задар го загубија двајца млади спортисти, Јосип Бепо Кадија и Јосип Бркљачиќ, откако со автомобил „ауди“ излетаа од патот и завршија во морето. 

Зад воланот бил Јосип Бепо Кадија кој имаше 19 години и беше талентиран ракометар на Загреб, додека 16-годишниот Бркљачиќ играше фудбал за екипата ХНК Примор од Биоград.

И безбедносните камери од брод го фатија трагичниот момент во кој се гледа како автомобилот вози со голема брзина и истиот влета во морето.

Тие не биле сами во автомобилот, несреќата ја преживеале нивни двајца пријатели, а на видеото се гледа како маж и жена, но и еден човек на велосипед во последен час ја избегнуваат несреќата. Од сопатниците, едно од момчињата е потешко повреден, а другото е надвор од животна опасност.

– Ни рекоа дека Бепо возеше над 100 километри на час – беа зборовите на неговата сестра во изјава за хрватските медиуми.

Крешимир Шкара, 22-годишното момче кое успеало да помине без потешки повреди, успеал сам да се извлече од автомобилот и некако успеал да исплива до брегот.

„Тој сам исплива до брегот. Му подадоа рака и му помогнаа да излезе. Слушнав само како рече „уште тројца се внатре“, а потоа со амбулантно возило го однесоа во болница. Никој од нас што бевме на лице место не скокна во морето затоа што беше многу темно, ништо не се гледаше, а беше и длабоко. Автомобилот многу брзо потона, немаше ни 30 секунди“, изјавил очевидец кој ловел риба недалеку од местото на несреќата за хрватски 24сата.