Голем удар за Канада: Без најголемата ѕвезда на Мундобаскет
Канадскиот кошаркар Џамал Мареј, играч на Денвер нагетс, ќе го пропушти Светското првенство што ќе се одржи од 25 август до 10 септември во Филипини, Јапонија и Индонезија, соопшти Канадската кошаркарска асоцијација.
Мареј изјави дека му е потребен дополнителен одмор по долгата сезона во НБА, во која ја освои шампионската титула со Денвер.
– Доаѓајќи во тренинг кампот сакав да видам како моето тело ќе реагира на долгата и напорна сезона и дали ќе бидам физички подготвен за Светското првенство. По консултации со медицинскиот штаб и раководството на репрезентацијата, решивме дека ми треба повеќе време за опоравување, па затоа нема да играм на СП. Сепак, сè уште имам цел да ја претставувам Канада на Олимписките игри, односно ќе ја поддржувам репрезентацијата на секој чекор – изјави 26-годишниот Мареј.
Покрај Мареј, настапот на Мундобаскет 2023 го откажаа и Никола Јокиќ (Србија), исто така член на Денвер нагетс, и Јанис Антетокунмпо (Грција), кој се повлече поради повреда.
Канаѓаните на претстојното Светско првенство ќе играат во групата „Х“ заедно со Летонија, Либан и Франција.
Jamal Murray to miss the FIBA Men’s Basketball World Cup.
Read more: https://t.co/2tDNktebOD#FIBAWC #WinForCanada pic.twitter.com/hj8KdFw2ET
— Canada Basketball (@CanBball) August 16, 2023