Како последен настан во програмата на 44. „Скопско лето“ е настапот на ансамблот „Камерата академика“ од Словенија. Концертот ќе се одржи на 31 јули (понеделник), со почеток во 20.30 часот, во салата при Музејот на македонската борба во Скопје.

Во програмата на концертот, покрај композиции од Марк Ишен, Леош Јаначек и Симон Кравос, ќе бидат изведени и варијации за дувачки секстет на македонската народна песна „Со маки сум се родил јас“ (прва изведба) на Сашо Ливрински, како и обработка на хорски композиции од Драган Шуплевски и Тодор Скаловски за дувачки секстет од Зоран Митев и композицијата „Кажи ми кажи Катинке“.

Ансамблот „Камерата академика“ е во состав Каролина Шантел Зупан (флејта), Матеј Шарц (обоа), Јоже Котар (кларинет), Зоран Митев (фагот), Јоже Рошер (хорна) и Миха Рогина (саксофон).

Фестивалот „Скопско лето“ е во организација на Дирекцијата за култура и уметност, која секое лето подготвува програма што одговара на потребите и интересот на граѓаните на Скопје. Мултимедијалната програма на фестивалот комуницира со сите генерации љубители на културата и уметноста во Скопје. Фестивалот традиционално веќе 44 години се одржува од 21 јуни до 31 јули секое лето.