Германскиот министер за економија Петер Алтмајер изјави денеска дека со прекинот на блокадата, предизвикана од коронавирусот во земјата, се очекува многу сектори брзо да закрепнат.

– Мораме да направиме напори идните генерации да не бидат оптоварени со долгови од оваа криза, истакна Алтмајер, додавајќи дека очекува германската економија да ги достигне нивоата како пред кризата, до втората половина на 2022 година. Сега не е момент да зборуваме за ублажување на мерките. Треба да се придржуваме кон ограничувањата во следните недели за да го запреме вирусот –  нагласи германскиот министер.

Германската Влада денеска ја намали прогнозата за раст за оваа година на три отсто. Кон крајот на октомври минатата година, Владата предвиде раст од 4,4 проценти оваа година. Набргу потоа, земјата започна делумна блокада и ја зајакна кон средината на декември.

Официјалните бројки објавени претходно овој месец покажуваат дека економијата се намалила за пет отсто минатата година, завршувајќи ја деценијата на раст. Сепак, ова е помал пад отколку што многумина очекуваа.

Извор:МИА