Германија ја повика Турција да не презема копнен напад на северот на Сирија
Германската министерка за надворешни работи Аналена Бербок ја повика денеска Турција да не презема копнен напад на северот на Сирија и воени удари во северен Ирак.
„Итно апелирав Турција да се воздржи од мерките кои дополнително би го зголемиле насилството“, рекла Бербок на маргините на состанокот на НАТО во Букурешт, каде бил присутен и нејзиниот турски колега.
Турските официјални претставници вчера изјавија дека на турските сили им се потребни само неколку дена за да бидат подготвени за копнен напад во северна Сирија, која веќе со денови ја напаѓаат со оружје со долг дострел и авиони.
Претседателот на Турција, Реџеп Таип Ердоган, вчера изјави дека земјата е решена да ја уништи Курдистанската работничка партија – до последниот терорист.
„Не ни треба ничие одобрение додека преземаме чекори во однос на безбедноста на нашата татковина и нашиот народ и никој за ништо нема да го известуваме“, рече Ердоган.
Ердоган: Никој за ништо нема да го известуваме за нашата операција во Сирија и Ирак