Гастрономско уживање од Дијана Иваноска: Домашен, крцкав леб
Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.
– Го сакам секој дел од процесот, но најмногу уживам во фотографирањето на храната – ни открива Дијана.
Инвентивната Дијана денеска споделува рецепт за едно гастрономско уживање – домашен, крцкав леб.
Состојки:
– 600 грама брашно (бело, интегрално или по 300 грама од двете)
– 360 мл вода млака
– 1 рамна лажица сол
– 1 ќесичка сув квасец (7 грама)
Подготовка:
Се замесува тесто од состојките и се остава да надојде 1 час покриено со пластична фолија.
Се става тестото на набрашнета работна површина и се дели на два дела.
Се обликува на следниот начин:
Се притиска со раце да се добие правоаголна форма и од пократката страна се витка во ролат со благо затегнување додека се витка.
Повторно се притиска за да се добие правоаголна форма и повторно се витка во ролат.
Уште еднаш се повторува овој чекор. Се затвораат и страните од ролатот.
На ист начин се обликува и другиот дел од тестото.
Двете векни се ставаат на хартија за печење и во пекач што има капак, или тенџерче што може да се користи во рерна. Се оставаат да нараснат покриени додека се загрее рерната на 250 степени Целзиусови.
Пред да се пече, лебот се засекува.
Се пече 40 минути на 250 степени со капак и уште 20 минути отворен на 200 степени Целзиусови.
Почекајте барем половина час пред да го исечете.