ФОТО+ВИДЕО | Помала и од зрно сол: Микроскопската чанта „Луј Витон“ се продаде за 63.000 долари
Малата чанта со димензии изразени во микрони, е продадена за над 63.000 долари на аукција оваа среда, пишува „Си-ен-ен“.
Едвај видлива за човечкото око, флуоресцентната жолтеникаво-зелена чанта е инспирирана од популарниот дизајн на чанти „Луј Витон“. Таа е производ на тим од дизајнери од Њујорк, а не на самиот луксузен бренд. Компанијата од каде произлегува оваа „микроскопска чанта“, вели дека е доволно мала за да помине низ дупчето на иглата и е помала од зрно морска сол.
Предметот е направен со помош на двофотонска полимеризација, технологија на производство што се користи за 3Д-печатење на пластични делови во микро размери. На аукцијата, се продала заедно со микроскоп, опремен со дигитален екран преку кој може да се гледа чантата.
Домаќин на аукцијата бил „Џупитер“ („Joopiter“), онлајн аукциска куќа основана од американскиот музичар и дизајнер Фарел Вилијамс. Иако Вилијамс моментално работи како креативен директор за машка облека на „Луј Витон“, главниот и креативен директор на компанијата „MSCHF“, Кевин Визнер, изјавил за „Њујорк Тајмс“ дека колективот не барал дозвола од него или од францускиот бренд да го користи логото или дизајнот.