Неверојатна енергија која лесно ја пренесува и на публиката, има холандската џез и поп саксофонистка Кенди Далфер, која синоќа со својот бенд одржа концерт за паметење во Филхармонија, во организација на „Авалон“.

Заедно со својот бенд, на Скопје му приреди ексклузивен и интимен концерт, но и енергично и возбудливо џез-поп-фанк шоу“.

Харизматичната Кенди е истовремено нежна и романтична, покажувајќи го тоа во мега популарната „Lily Was Here“, но и страствена во „My Funk“, и целата фанк, соул и џез приказна која низ својата музика ја раскажува. Има 53 години, а во себе уште ја носи младоста од деведесеттите, токму од времето кога „Lily Was Here“, си ја потпевнуваше целиот свет.

Кенди раскажа лична приказна, од времето на пандемијата, период кој ја скршил и ја разочарал.

„Како водач на бендот, јас морав да бидам силна. Седевме дома, не можевме да се видиме, да се допреме, беше ужасно. Тогаш им се јавив на момчињата од бендот и им реков: Еј дечки…“, кажа Кенди и се имитираше самата себеси како знаела да заплаче во телефонските разговори.

„Тие ме тешеа мене, место јас нив: ‘Еј Кенди, ќе биде се во ред. Еден ден, повторно ќе се вратиме на сцената и ќе размениме љубов со публиката’. И беа во право“, рече саксофонистката, која освен што е одлiчен инструменталист, располага и со моќен вокал.

Во повеќе наврати, не пропушти да каже дека животот сега ѝ е комплетен, дека е многу среќна што повторно го прави тоа што го сака. Публиката ѝ го направи меракот кога запеа заедно со неа, но за комплетно доживување на овој убав концерт придонесе и бендот, уиграни музичари и двајца пејачи кои фанкот го имаат во малиот прст.

„Јас сум секогаш позитивна личност, немам време да се нервирам и да им судам на луѓето. Но, понекогаш знам да се налутам, поради нештата кои се случуваат околу нас, војните, на пример. Затоа ја напишав песната „No Time For This“, рече Кенди.

Во песната која излезе минатата година таа вели: „Немам време за ксенофобија, хомофобија, немам време за расизам, сексизам, и конечно – немам време за војни“.

Едноставна, но многу точна е филозофијата на музичарката која ја шири секаде низ светот, а ја научила најмногу по пандемијата: „Животот е краток и треба повеќе да се забавуваме“. А Скопје доби една врвна забава и ги испрати оваа неверојатна дама која не престана да танцува и нејзиниот бенд на нозе, како што заслужија.

Реприза на шоуто на Кенди и на бендот ќе се случи вечерва, на втор концерт во Филхармонија, од 20 часот.