Рекордни 22 трки ќе се одржат следната сезона во Мото ГП шампионатот, соопштија денеска организаторите. Во годината кога Мото ГП ја слави својата 75-годишнина, во 2024 година ќе се одржат 22 трки во 18 земји.

Сезоната ќе започне на 10 март со трката во Катар, а ќе заврши на 17 ноември во Валенсија. Трките се групирани географски за да им се олесни на тимовите да патуваат.

Големата награда на Арагон, која ќе се одржи на 1 септември, се враќа во календарот. Во Шпанија ќе се одржат четири трки, а новина во календарот е трката во Казахстан, која за првпат ќе организира натпревар во „кралската“ класа.

Пред летната пауза ќе има 11 трки, а исто толку и по паузата која е закажана од 7 јули до 2 август.

Шампионатот започнува на 10 март во Катар, а втората трка е закажана за 24 март во Португалија. Трката во Аргентина се вози на 7 април, а седум дена подоцна се одржува и трката за Големата награда на САД.

Претпоследната трка на програмата е на 3 ноември во Малезија, а сезоната завршува на 17 ноември во Валенсија. Домаќин на резервната трка ќе биде Унгарија на патеката Балатон.