Босанскиот пејач Един Дервишхалидовиќ, познат како Дино Мерлин, е еден од омилените изведувачи на македонската слушачка публика, која секогаш со голема радост ги посетува неговите концертни настапи кај нас.

Предновогодишно, Дино Мерлин синоќа одржа концертен спектакл во Скопје, поточно во арената „Борис Трајковски“, а вечерва е во тек и неговиот втор концерт пред неговите обожаватели во македонската метропола.

Непосредно пред вечерашниот концерт, македонскиот претседател Стево Пендаровски одржал неформална средба со Дино Мерлин во еден скопски ресторан.

„Пријатен муабет со легендарниот босански музичар Дино Мерлин пред неговиот вечерашен концерт во Скопје“, напиша Пендаровски во објавата на социјалните медиуми.

Како што може да се види на фотографиите, Дино Мерлин му врачил подарок на нашиот претседател од неговата продавница „Магаза“, која постои веќе три децении и се наоѓа во Башчаршија – старата чаршија во Сараево.