Лајпциг, новиот клуб на македонскиот репрезентативец Елиф Елмас, информираше дека екипата од 2 до 7 јануари ќе се подготвува во зимскиот тренинг камп во Ла Манга, Шпанија.

Играчите предводени од тренерот Марко Розе ќе ја темпираат формата за вториот дел од сезоната.

И нашиот фудбалски „дијамант“ Елмас ќе тренира со своите нови соиграчи, а во тимот во овие зимски подготовки нема да бидат Амаду Ајдара и Илајш Мориба кои ќе настапат на Африканскиот куп на нации.

Со првиот тим ќе патуваат и млади играчи на клубот: Тим Колер, Лени Хениг, Нуха Јата, Винерс Осаве и Јаник Едуардо.

Новиот бундеслигашки натпревар тимот на Лајпциг ќе го има на 13 јануари на домашен терен против Ајнтрахт Франкфурт. Моментно составот на Розе по 16 одиграни мечеви е на четвртото место со 33 бодови, водечки е Баер Леверкузен (42), пред Баерн (38) и Штутгарт (34).

Популарните „бикови“ во февруари и март ќе го играат двомечот од осминафиналето во Лигата на шампионите против Реал Мадрид.