Фон дер Лајен предупредува: Унијата може да спречи поголем извоз на вакцини
Шефицата на Европската Комисија (ЕК), Урсула фон дер Лајен денеска предупреди дека Унијата може да го запре понатамошниот извоз на вакцина за коронавирус, откако Италија ја запре пратката за Австралија.
– Тоа не беше еднократно, рече претседателката на ЕК за деловниот весник Виртшафтсвоче.
Минатата недела Италија соопшти дека го блокирала извозот на 250.700 дози од вакцината на „АстраЗенека“ наменети за Австралија, посочувајќи дека има недостиг од вакцини во Европа, додека истовремено Австралија нема итна потреба од нив.
Бранејќи ја одлуката на Италија, Фон дер Лајен рече дека „АстраЗенека“ испорачала помалку од 10 проценти од тоа што Унијата порачала од декември до март.
Европската Комисија ја критикуваше англо-шведската компанија за неуспехот да го исполни својот распоред за испорака до ЕУ, истовремено доставувајќи ја сета нарачка за Велика Британија.