ФИЛМСКА ПРЕМИЕРА: „Диви и среќни“ во „Синеплекс“
Актерката Јана Маринова, позната како поранешната газдарица Преслава на пансионот „Преспав“ од истоимената ТВ-серија, пред македонската публика лично ќе го претстави својот нов игран филм „Диви и среќни“, каде што таа се јавува како продуцент и главна улога. Филмот „Диви и среќни“ во режија на Мартин Макариев е возбудлива, акциона комедија што рекордно ги наполни киносалите во Бугарија, со што стана еден од најгледаните филмови за 2019 година. Бугарската публика и филмска критика го опишаа како „најзабавниот филм во последно време“ и „нешто сосема поинакво од типичните бугарски филмови“.
Главните актерки Јана Маринова и Луиз Григорова-Макариев изведуваат каскадерски акробации, скокаат од оган, возат бесни мотори и предизвикуваат судири со автомобили. Филмот имаше свои премиери ширум Европа и е првиот бугарски филм што обезбедил дистрибуција во Македонија. Досега бил прикажан во Лондон, Глазгов, Единбург и во Виена, а сега актерската екипа ќе биде домаќин и на скопската премиера во „Синеплекс“ на 13 февруари, а од истиот датум премиерно ќе се прикажува и во 3Д-Битола.
(Текстот е објавен во „Културен печат“ број 17, во печатеното издание на „Слободен печат“ на 8-9 февруари 2020)