Министерот за здравство Венко Филипче во дебата на „360 Степени“ зборуваше за можното одложување на јавните собири за да се превенира ширење на коронавирусот, како и за тоа дали има можност да се одложат изборите кои се закажани за 12 април.

– Здравјето на луѓето е на прво место и мислам дека е рано да се зборува за предизборната кампања. Динамички ќе ја следиме ситуацијата, ќе гледаме како оди влезот на луѓе од ризичните региони, дали има сомнителни,ова е прашање коешто е издигнато на највисоко ниво во владата – рече Филипче.

Тој посочи дека епидемиолошките податоци коишто се причина за препорака за ограничувањето на јавни собири се од причина што има една пациентка којашто е заболена и неколку луѓе коишто се во домашна изолација и кои знаат од каде дошле, каде се упатиле, токму кога таму се планирале големи масовни собири и согласно анамнестичките податоци на пациентката, кога првпат се јавиле симптомите, колку време претходно била во инкубација, и сега сметале дека треба оваа мерка да важи за следната недела до петок на 6 март.

Во однос на прашањето за одложување на изборите, Филипче вели дека се уште е рано да се зборува за тоа и дека според епидемиолошките податоци, треба да бидеме внимaтелни само во текот на следната недела до 6 март и дека тогаш завршува критичниот период којшто се поврзува со пациентката којашто се лекува, но дека ситуацијата интензивно се следи.