Ешли Бајден, ќерката на Џо Бајден, е подготвена да го освои Вашингтон: „Таа е една застрашувачки јака сила“
„Оваа прва ќерка ќе биде изненадување за целиот свет. Знае која е и што е, знае што сака да постигне. Таа е една застрашувачки јака сила. Долго се чувствуваше ранливо и немаше сила да зачекори во центар на случувањата, но ова сега е нејзино време и ќе има многу што да каже. Низ многу работи помина во животот и тоа ѝ дава доза емпатија кон другите. Од неа можете да го очекувате само најдоброто“, порачал упатен извор од Вашингтон, пренесува Дејли мејл.
Новоизбраниот американски претседател Џо Бајден на 20 јануари 2021 година ќе ја положи претседателската заклетва, а секако, во тој момент покрај него ќе бидат неговите најблиски – сопругата Џил, со која е во брак 43 години, неговиот 50-годишен син Хантер Бајден, како и неговата ќерка Ешли Бајден, која ќе стане новата американска „прва ќерка“.
Иванка Трамп, ќерката на Доналд Трамп, која беше активна на сите полиња додека татко ѝ беше претседател, ја популаризираше функцијата „прва ќерка“.
Со оглед на тоа што Џил Бајден веројатно нема да се откаже од нејзината професија, американските медиуми претпоставуваат дека местото на светската сцена по инаугурацијата ќе го заземе токму 39-годишната Ешли Бајден.
„Ешли досега не беше во центар на вниманието зашто не беше подготвена за тоа, а не покажуваше ни волја. Кога Џо беше потпретседател за време на мандатот на Барак Обама, имаше некои проблеми и не ги истакнуваше. Но сега ќе си дојде на свое како „прва ќерка“ и таа функција во новата управа ќе биде подеднакво важна како и во минатата. Иванка имаше сопствена канцеларија, патуваше низ светот придружувајќи го татко ѝ, имаше големо влијание на него, а успеа да склучи и некои добри зделки. На некој начин му беше десна рака на татко ѝ. Истото можете да го очекувате и од Ешли“, изјавил за медиумите извор од Вашингтон.
Ешли е родена во 1981 година. Она што е познато за неа е дека се бори за зачувување на околината, а уште како дете го открила постоењето на козметичкиот бренд Bonne Bell, кој своите производи ги тестирал на животни, па татко ѝ ја охрабрил да им напише писмо и да бара да ја сменат политиката на работењето, поттикнувајќи го така нејзиното интересирање за околината, а посебно за заштита на делфините.
„Еш е зеница во окото на татко ѝ, но имаше многу проблеми, проблеми со зависноста“, открил извор близок на семејството.
Проблемите почнале откако во 1999 година наводно била уапсена поради поседување марихуана, но обвинителната пресуда никаде не била забележена. Потоа во 2002 година повторно била уапсена поради наводно попречување на полициски службеник во извршување на работата.
Седум години подоцна додека татко ѝ беше потпретседател на САД наводно на пазарот на американските таблоиди се појавило видео во кое се чинело како Ешли зема кокаин со црвена цевка. Во тоа време New York Post пишувал дека сопственикот на снимката бара два милиони долари, па снимката не била објавена поради високата цена.
Во 2010 година Ешли го запознала пластичниот хирург Хауард Креин, кој е 14 години постар од неа и со која денес е во среќен брак.
Се венчале во 2012 година на врвот на една карпа во Калифорнија а до олтарот ја однел нејзиниот татко.
Ешли не крие дека смртта на брат ѝ ја скршила и дека поминувала низ еден навистина тежок период во животот.
„Беше мојата сила. Неговиот рак ме фрли на колена. Немав избор освен да тргнам напред и цел да ми бидат моите соништа“, изјавила Ешли во една прилика.