Драмски театар со претставата „Фирма“ гостува на РУТА во Љубљана
Драмски театар Скопје со претставата „Фирма“ на 7 февруари ќе гостува во Словенија. Во Љубљана од 2 до 7 февруари, во организација на Местно гледалишче Љубљана, се одржува третото словенечко издание на регионалниот театарски фестивал РУТА.
Претставата „Фирма“ на режисерката Нела Витошевиќ е работена според „Push up 1-3“ од Роланд Шимелфенинг. Драматург е Викторија Рангелова Петровска. Сценографијата е на Костантин Трпеноски (mvv.design). Костимите се на костимографката Розе Трајчевска-Ристоска, а изборот на музиката е на Нела Витошевиќ. Фотограф е Стефан Стамандов. Инспициент на претставата е Гоце Бојчев, а суфлер е Жаклина Цветковска.
Во претставата играат актерите Ирена Ристиќ, Ивана Павлаковиќ, Сања Арсовска, Филип Трајковиќ, Игор Ангелов и Стефан Вујисиќ.
Режисерката Нела Витошевиќ за претставата и за авторот истакнува дека Роланд Шимелфенинг е еден од најплодните, најуспешни и најпреведувани германски автори. Поради тематската актуелност „Фирма“ (Push Up 1-3) авторот храбро прави вивисекција на капиталистичкото општество и последиците што доаѓаат како резултат од така поставениот систем.
– Тој во преден план ја истакнува бескрупулозната борба на индивидуата која се стреми да се искачи на врвот на хиерархиската пирамида, како и проблемот на осаменоста и отуѓеноста кои се рефлексија на таквото капиталистичко уредување. Целото дејство се случува во ИТ-корпорација. Во тоа „застрашувачко“ опкружување карактерите се натпреваруваат меѓусебно за повисока позиција во фирмата. Механизмите да се стигне до врвот се бескрупулозни, карактерите се служат со вербална манипулација и лицемерие за да го зграбат она што го посакуваат. Посветени да ги добијат овие битки, тие остануваат без социјален живот, затворени во нивните големи празни станови, асоцијативни за нивната духовна и социјална празнина – истакнува режисерката Витошевиќ.
Премиерата на „Фирма“ беше на отворањето на фестивалот РУТА, што Драмски театар Скопје го организираше во октомври минатата година. Претставата досега е изведена десет пати на матичната сцена и ова гостување во Местно гледалишче Љубљана е прво гостување на претставата во странство, известија од Драмски театар Скопје.