Дојави за бомби во 19 средни и девет основни училишта, евакуиран и Основниот суд во Охрид
Закани за поставени експлозивни направи, утрово до 10 часот добиле 19 средни и и осум основни училишта во Скопје, едно основно училиште во Прилеп и Основниот суд во Охрид.
Денеска (27.02.2023) до 10:00 часот во МВР било пријавено дека на електронските адреси на 19 средни и осум основни училишта во Скопје, едно основно училиште во Прилеп и Основниот суд во Охрид е упатена закана за поставена експлозивна направа, соопшти Министерството за внатрешни работи.
Познато е дека дојави за бомби има во гимназиите „Никола Карев“ и „Јосип Броз Тито“, како и основното училиште „Лазо Ангеловски“ во Ново Лисиче.
Во Основниот суд Охрид утрово во осум часот биле евакуирани вработените во објектот.
На местото се екипи на полицијата, на Службата за итна медицинска помош како и на Територијалната противпожарна единица. Објектот е изолиран, а полицијата не дозволува двиќење возила и пешаци на едниот крак од булеварот „Македонски просветители“.
По добиените пријави, полицијата презема мерки за безбедно евакуирање на објектите и во тек се антитерористички проверки и се преземаат мерки за расчистување на случаите.
Минатата недела, Министерството за образование и наука донесе итна мерка во деновите кога има закана за поставена експлозивна направа во основните и средни училишта, учениците наставата да ја следат онлајн, наместо да има целосен прекин на наставата. Учениците, како што препорача МОН имаат еден час да стигнат дома и да се приклучат онлајн.