Британскиот премиер Борис Џонсон денес изрази подготвеност договорот за иранската нуклеарна програма од 2015 година да ја замени со нов текст кој го предложува американскиот претседател, оценувајќи дека Доналд Трамп е „извонреден преговарач“.

– Претседателот Трамп е извонреден преговарач…Ајде да работиме заедно за да го замениме договорот од 2015 година со договорот на Трамп – рече Џонсон за британската телевизиска мрежа Би-Би-Си и додаде дека тоа би било „добар начин за напредок“.

Изјавата на Џонсон е во спротивност со ставот на британската дипломатнија, која се залага за опстанок на постоечкиот договор.

Од моментот кога САД се повлекоа од договорот во 2018 година, Велика Британија, Франција и Германија, кои го потпишаа договорот, вложуваат напори со останатите потписници, Кина и Русија, за договорот да опстане.

Лондон, Париз и Берлин денес го стартуваа механизмот за решавање на спорот кој е предвиден со договорот, за да го примораат Иран повторно да ги почитува своите обврски.