Данците оптимисти: Големи фаворити против Вардар, но не мисли така и Мадсен
Алборг стартуваше успешно во групата „А“ од Лигата на шампионите со победите на гости против ППД Загреб (24:34) и дома над Монпеље (36:28). Данската екипа е предводена од тренерот Стефан Мадсен, следниот натпревар во ЛШ ќе го имаат в среда во Скопје против двократниот европски шампион Вардар 1961.
„Црвено-црните“ започнаа со реми кај Елверум (27:27) и триумф против Мешков Брест (35:27) со одличната поддршка од трибините, а се очекува така да биде и против Данците.
Најголема ѕвезда во редовите на Алборг е исландскиот плејмејкер Арон Палмарсон, но тој заедно со Себастијан Хенеберг (исто така среден бек) и шведскиот голман Микаел Агефорс немаат да играат против Вардар 1961 поради повреди.
Тимот воглавно е скандинавски, со Данци, Швеѓани, Норвежани и секако практикуваат еден брз ракомет на што секако треба особено да обрне внимание македонскиот шампион. И во данските медиуми веруваат дека Алборг е голем фаворит против Вардар 1961, но не мисли така и тренерот Мадсен.
– Да, сакаме да ја прифатиме фаворитската улога, но таа најчесто се користи за да ги удира луѓето по глава. Знаеме што ни треба и знаеме дека можеме да победиме. Вардар е традиционален клуб кој остварувал големи триумфи во долг период. Но, сега не се така доминантни во последните неколку години. Тоа е екипа која сега во составот ги има новите засилувања, браќата Кевин и Оливие Њокас.
Секако дека можеме да победиме, но ќе биде тешко. Во Скопје ќе бидеме под притисок. Вардар е клуб со две лица, дома и гости. На домашен терен тие се навистина многу силни. Ова е за првпат по подолг период да имаме сериозен тест на гости, очекуваме многу луѓе да дојдат на натпреварот – вели Мадсен.
Дуелот во СЦ „Јане Сандански“ – Скопје помеѓу Вардар 1961 и Алборг ќе се игра утре (29 септември) од 18.45 часот.