Словенечкиот претседател Борут Пахор смета дека тоа што во моментов ѝ се случува на С. Македонија на патот кон ЕУ е неправедно.

„Тешко ѝ е сега на Северна Македонија. Мислам дека тоа што сега го прави Бугарија не е праведно. Бугарија да верува на Северна Македонија, дека некои работи ќе ги реши во заеднички дух, да ја тргне блокадата и Северна Македонија да може да оди понатаму на европскиот пат. И, се разбира потоа во дијалог со Бугарија, да решат некои прашања, така како што е праведно“, вели Пахор во интервју за „Гласот на Америка“ на македонски јазик.

Според него, барањата околу идентитетот и историјата се нерационални.

„Знам дека се чувствителни, но мислам дека тоа не е можно да се реши преку ноќ, а не со една политичка блокада. Тоа се чувствителни и емотивни прашања за едната и за другата страна и за првпат се наоѓам во една ситуација кога велам црно-бело, не ја подржувам Бугарија во таа ситуација кога ја блокира Северна Македонија“, додава Пахор.