Пресвртната точка во битката со ковид-19 беше создавање на вакцини. Со нивна помош, можеме да се справиме со пандемијата и да ја вратиме слободата што ни ја одзеде вирусот. Ви благодарам за надежта и можноста повторно да го имаме претходниот начин на живот, рече премиерот Бојко Борисов во телефонски разговор со професор Угур Шахин, основач на германската компанија „БајонТек“, која заедно со американската компанија „Фајзер“ ја развија една од првите вакцини против коронавирус во светот, соопшти пресслужбата на бугарската влада.

Како што јави дописникот на МИА од Софија, бугарскиот премиер Борисов истакна дека главниот предизвик денес е вакцините да бидат достапни за сите граѓани не само во Европската Унија, туку и ширум светот.

– Затоа што никој не би бил безбеден од коронавирусот се додека не бидеме заштитени сите, нагласил Борисов.

Бугарскиот премиер му честита на германскиот научник за исклучително високотехнолошкото откритие, а тоа е вакцината создадена од „БајонТек“. Борисов истакна дека се повеќе и повеќе бугарски граѓани се подготвени да бидат вакцинирани затоа што се убедени во придобивките од имунизацијата, која спасува животи. За време на разговорот, премиерот Борисов истакна дека Бугарија има долга традиција во производството на лекови и на вакцини.

Борисов ја искористи приликата да го покани германскиот научник Шахин и неговиот тим да ја посетат Бугарија и да се запознаат со активностите на „БулБио“ за производство на вакцина против ковид-19.