Поранешните вработени од скопската фабрика „Охис“ и денеска излегоа на протест пред Владата. Дел од булеварот „Илинден“ е блокиран за сообраќај, бидејќи вработените од фабриката која е во стечај повторно го изразуваат револтот.

Тие секој вторник и петок ги потсетуваат властите дека треба да им се исплатат 24 плати и придонеси од плата за 16 месеци. Според информациите, поранешните вработени имаат неисплатени осум плати од 2008 година и 16 плати од 2012 и 2013 година. Пред три дена поранешните вработени на „Охис“ добија ветување од Владата дека во петок, односно денеска ќе имаат средба.

Очекуваат државата да им ги исплати платите бидејќи имала доминантен општетствен капитал во фабриката.

Досега, повеќепати протестираа пред надлежните институции и имаа средби со владини претставници, добивале ветувања, но ништо не е исполнето.