Архитектите Томас Ромеро Талеј од Барселона и Матеус Сартори од Бразил денеска ја посетија спортската сала „Наум Наумовски – Борче” позната како „Партизан” и се заинтересирани за нејзина обнова. Покрај нив, салата ја посетија и претставници од Општина Карпош, Меѓународната невладина организација „Културно Ехо”, Стрелачката федерација и Сојузот на ветерани.

– Тим од Општина Карпош, заедно со „Културно ехо” и двајцата архитекти веќе работат на идејното решение за салата и на програмско – содржинскиот концепт со цел да почне процесот на ревитализација штом „Партизан” се врати во сопственост на Општина Карпош. Сите страни се согласни дека треба да се задржи автентичноста на објектот и намената на просторот, но и да се направи стратегија за одржливост на овој култен спортски објект, се вели во соопштението од Општина Карпош.

Иницијативата за спас и обнова на „Партизан” има обединувачки карактер, со вклучување на повеќе засегнати институции, граѓанскиот сектор, спортските работници и стручната јавност (архитекти).