– Приходите од придонесите во претходната година пораснаа за 10 проценти, што е резултат не само на оние 0,4 проценти кои што се слеваат во пензискиот фонд, туку и на зголемување на вработувањата. Имаме и историски најмала стапка на невработеност, изјави во Утрински брифинг на „Слободен печат“, министерката за финансии Нина Ангелова.

Таа вели дека очекуваат наредната година да има пораст и позитивни ефекти и поради зголемување на минималната плата и со сите мерки што се реализираат ќе се зголемат приходите на Пензискиот столб.

– Во однос на непокриениот буџетски дефицит кој што се дополнува од страна на буџетот – ако во 2018 година изнесува 16,5 милијарди денари, сега тој е 16,3, што значи се работи за стабилизирање, бидејќи клучно е стабилизирањето на Пензискиот фонд за нашата економија, за нашата земја, бидејќи имаме популација која допрва ќе старее“ , рече Ангелова.