САД извршија воздушни напади во Авганистан за поддршка на владините сили под притисок на талибанците, во време кога странските сили, преведени од Соединетите држави, ја спроведуваат последната фаза од нивното повлекување од таа земја, пренесува Ројтерс.

Портпаролот на Пентагон, Џон Кирби, за новинарите изјави дека воздушните напади биле извршени за поддршка на авганистанските безбедносни сили во последните неколку дена, но тој не даде дополнителни детали.

Портпаролот на талибанците Забихулах Муџахид изјави дека нападите биле извршени во средата вечерта на периферијата на градот Кандахар на југот на земјата и дека тројца нивни борци биле убиени, а две возила биле уништени.

„Ние ги потврдуваме овие воздушни напади и силно ги осудуваме, бидејќи станува збор за очигледен напад и кршење на договорот во Доха, затоа што тие не можат да имаат операции по мај“, рече Муџахид, осврнувајќи се на договорот меѓу САД и Талибанците со кој се отвори начин за повлекување на американските сили.

„Ако извршат каква било друга операција, тогаш тие ќе бидат одговорни за последиците“, предупреди портпаролот на талибанците.

Скоро сите американски трупи, освен оние што ја штитат амбасадата во Кабул и аеродромот во главниот град, ја напуштија земјата.