Гринпис соопшти дека нивните активисти се обиделе да блокираат танкер кој треба да испорача руска нафта во Норвешка, врзувајќи се со синџири за сидрото на бродот во знак на протест против војната во Украина.

Според соопштението на Гринпис, активистите пристигнале со мал чамец пред да се врзат со синџир за сидрото на танкерот додека се обидувале да спречат истовар на околу 95.000 тони нафта. Танкерот „Уст Луга“ моментално е закотвен на околу 70 километри јужно од Осло.

„Шокиран сум што Норвешка работи како слободно пристаниште за руската нафта, за која знаеме дека го финансира војувањето на Путин“, рече шефот на Гринпис во Норвешка, Фроде Плејм.

Гринпис ја повика норвешката влада да го забрани увозот на руски фосилни горива и рече дека Есо Норвешка треба да ги откаже сите договори за таков увоз од Русија по инвазијата на Украина.