„Адидас“ повеќе не продава германски дрес со број 44
Корисниците на социјалните мрежи забележаа дека бројот 44 на новодизајнираниот дрес, откриен минатиот месец, наликува на логото (SS), паравоена организација контролирана од нацистите и Адолф Хитлер.
Германскиот производител на спортска опрема „Адидас“ и Германската фудбалска федерација (ДФБ) ја прекинаа продажбата на новиот национален дрес со број 44 по критиките дека личи на логото на нацистичката организација СС.
– Ќе ја запреме персонализацијата на дресовите во нашите онлајн продавници – објави Оливер Бриген, портпарол на Адидас, пренесе ДПА.
До понеделник попладне веќе не можеше да се персонализираат дресовите со лични имиња и броеви.
Во меѓувреме, ДФБ ја прекина испораката на дресови со број 44 веќе нарачани во онлајн продавницата.