Денеска во СЦ „Јане Сандански“ осум екипи ја започнуваат битката за пласман во најквалитетното регионално кошаркарско натпреварување, АБА лигата, а меѓу нив е и македонскиот шампион МЗТ Скопје.

Токму „металците“ се домаќини на завршниот турнир во АБА2 лигата, а на него стартуваат од првата позиција бидејќи имаа најдобар скор на турнирите од регуларниот дел од сезоната (10-3).

Прв противник на МЗТ Скопје е екипата на Сутјеска, натпреварот ќе започне од 18 часот, а „металците“ имаат дополнителен мотив.

Регуларниот дел од сезоната, „металците“ го завршија со само три порази, а еден од нив беше токму од Сутјеска, црногорскиот тим во осмото коло славеше со 56:55.

Тренерот на МЗТ Скопје Александар Петровиќ вели дека приоритет е освојување на титулата и влез во АБА лигата, а не одмазда за поразот.

– За мене како тренер приоритет е влез во АБА лигата. Затоа титулата во АБА2 лигата е најбитна, не само за МЗТ Скопје туку и за македонската кошарка. Мобилизрани сме за таа цел. Распоредот е тежок, три меча во пет дена. Но играме дома и треба тоа да го искористиме на најдобар начин, за да го вратиме МЗТ Скопје  во АБА лигата – ни изјави Петровиќ во разговор неколку дена пред стартот на турнирот.

Турнирот започнува точно на пладне со натпреварот Борац Бања Лука – Младост.
Денеска ќе се играат натпреварите од четвртфиналето и тоа по принцип првиот со осмиот, вториот со седмиот, третопласираниот и шестопласираниот и четвртиот и петтиот тим од регуларниот дел од сезоната.
Полуфиналните натпревари ќе се играат в петок, додека средбата која ќе го даде патникот во АБА лигата ќе се игра во недела.

Денеска играат:
Борац Бања Лука – Младост (12 часот)
Хелиос Санс – Златибор (15 ч.)
МЗТ СКОПЈЕ – Сутјеска (18 ч.)
Широки Бријег – Спарс (21 ч.)