За карпошани од понеделник субвенции за нов велосипед или електричен тротинет
Од понеделник Општина Карпош започнува акција за субвенционирање на граѓаните кои ќе купат нов велосипед и електричен тротинет. Ќе се надоместува до 30 отсто од цената и тоа најмногу до 3.000 денари за оние кои ќе се подноват со велосипед и до 5000 денари за купен тротинет.
Право на аплицирање за субвенциите имаат сите полнолетни жители на општина Карпош, кои ќе купат нов велосипед или електричен тротинет започнувајќи од 21.03.2022 година. Притоа, жителите на Карпош кои веќе оствариле право на субвенција за оваа намена или пак добиле средства од Град Скопје за тековната година, немаат право да учествуваат на јавниот оглас – објаснуваат од Карпош.
Заинтересираните кои ќе аплицираат за субвенции треба, освен барање за субвенција, да поднесат изјава за согласност за обработка на лични податоци, лична карта и фискална сметка за купен велосипед или електричен тротинет, кој не треба да е купен порано од 21 март.
Акцијата ќе трае до исцрпување на предвидените финансиски средства, а ќе се спроведува по принципот „прв дојден, прв услужен“.