Вучиќ за авиолинијата Приштина-Белград: Постигнавме договор без да го признаеме Косово
За критиките на политичките противници, српскиот претседател изјави деке нивните критики покажуваат колку се несериозни и дека не разбираат ништо.
Претседателот на Србија, Александар Вучиќ, го оцени како многу важно потпишувањето на писмото за воспоставување на авиолинијата Приштина–Белград, за кое, вели Вучиќ, дека е воден долг дијалог и е постигнат компромис за кој никој не може да рече дека тие го признале Косово.
Српскиот претседател, кој е во Давос, за договорот се заблагодари на специјалниот пратеник на претседателот на САД, Доналд Трамп, за дијалогот Србија-Косово, Ричард Гренел, амбасадорот на САД во Германија и Советникот за национална безбедност на САД, Рајан О Брајан.
– Благодарен сум за енергијата и напорот што ги даваат Гренел и О Брајан. Нема да биде лесно за нас и за американците да ги направиме сите овие работи. Јас сум благодарен за интересот покажан од страна на (Доналд) Трамп, изјави Вучиќ, кој додаде дека во Давос, ќе има средба со О Брајан.
Во врска со критиките зошто операторот на директната линија нема да биде „Air Serbia“, Вучиќ рече дека ова Албанците би го посакале најмногу, но дека за нив тоа било невозможно.
– „Air Serbia“ ќе требаше да ги потпише сите документи со Косово. Требаше да потпише договор со аеродромот „Адем Јашари“, дури и Косово, како држава да ја признаеме за делот од воздушната територија која не е под наша контрола. Затоа, ние баравме и се боревме да се вклучи и КФОР, да имаме еден посредник, некој кој што е решен за тој дел со Резолуција на ООН, додаде Вучиќ.
За критиките на политичките противници, Вучиќ изјави деке нивните критики покажуваат колку се несериозни и дека не разбираат ништо.
– Успеавме да најдеме компромисно решение каде што никој не може да ни рече дека сме го признале Косово. Тие што напаѓаат знаат многу малку, затоа прашајте како е можно овие луѓе некогаш да ја воделе земјата, изјави Вучиќ.