„Вол Стрит Џурнал”: САД планираат во Украина да ги испратат моќните тенкови „Абрамс”
Весникот „Вол Стрит Џурнал” пишува дека администрацијата на американскиот претседател Џо Бајден е се поблиску до одлуката за испраќање на моќните американски тенкови „Абрамс” во Украина, додавајќи дека одлуката би можела да биде соопштена уште неделава.
Белата куќа не сакаше да го коментира написот, но весникот наведува дека „одлуката за испраќање на „Абрамсите” би била дел од поширок дипломатски договор, во кој Берлин ќе објави испраќање на помал број свои тенкови „Леопард 2″ во Украина и во исто време ќе ги овласти Полска и другите земји да испратат тенкови „Леопард” во Украина”.
Ваквиот договор, според „Вол Стрит Џурнал” ќе ги смири несогласувањата меѓу САД и Германија околу испраќањето тенкови во Украина, што се закануваат со поширок јаз меѓу западните земји како што се приближува првата годишнина од руската инвазија на Украина.
Промената на американската позиција, според весникот, уследила по телефонскиот разговор меѓу американскиот претседател Бајден и германскиот канцелар Олаф Шолц, за време на кој Бајден наводно се согласил да размисли за испраќање на тенкови „Абрамс” и покрај оценката на Пентагон. Висок германски функционер за весникот изјави дека за ова изминатата недела се водат интензивни преговори меѓу Берлин и Вашингтон. Во моментов, тврди „Вол Стрит Џурнал”, се чини дека наскоро е можно решение на проблемот.
Германската Влада најитно ќе се ангажира за барањето на Полска да и се дозволи на Варшава да извезува тенкови „Леопард” во Украина, изјави денеска државниот секретар во Министерството за економија Свен Гиголд.
Претходно Германија го доби официјалното барање на Полска за повторен извоз на тенкови „Леопард” во Украина, објави полскиот министер за одбрана Мариуш Блашчак.
Полска испрати барање до Германија за испорака на тенковите Леопард