23:08 ФОТО: Анонимуси тврдат дека ја хакирале страницата на руската разузнавачка служба

Анонимуси денеска објавија дека хакирале неколку руски сајтови во борбата против инвазијата на Путин на Украина, а меѓу нив се и страниците на руската разузнавачка служба ФСБ (наследник на КГБ) како и страниците на руската влада.

Тие го објавија ова на Твитер користејќи го воениот термин „Танго надолу“, додавајќи дека хакирале уште две страници, аналитички центар на руската влада и Министерството за спорт.

Russian sites under attack [Tango Down]
Moscow
FSB
Analytical Center for the Government of the Russian Federation
Ministry of Sport of the Russian Federation#Anonymous #OpRussia pic.twitter.com/OLOMSNBvWr

— Anonymous (@YourAnonNews) March 15, 2022

22:11 Телото на младата манекенка која го нарече Владимир Путин „психопат“ пронајдено мртво во куфер

Телото на руската манекенка Грета Ведлер (23 г.) беше пронајдено скриено во куфер по повеќе од една година откако исчезна. Ведлер беше убиена еден месец откако таа објави на социјалните мрежи го нарече Владимир Путин „психопат“ и предвиде дека неговата желба да „го подобри интегритетот на Русија“ за многумина ќе заврши со солзи.

„Важно е психопатите секогаш да имаат чувство на исполнетост и острина во животот, па затоа сакаат ризик, интензивни искуства, интензивна комуникација, интензивна активност – интензивен и динамичен живот. Можеби тој навистина сака да го подобри интегритетот на Русија и искрено посакува добро на Русите. Но, дали тој навистина може да направи нешто ? Мислам дека и вие самите го знаете одговорот на ова прашање“, изјави тогаш Ведлер.

Body of Russian model, Gretta Vedler who branded Putin a 'psychopath' is found stashed in suitcase in car boot a year after she went missing (Photos) – https://t.co/15FIlmksB9 pic.twitter.com/O4BzMSgNDq

— TSB News (@TSBnewsnigeria) March 14, 2022

20:57 Девојчето кое го освои светот со песна во засолништето: Посакувам да сум со мама и тато

Седумгодишното девојче Амелија Анисович, кое го освои светот по видеото на Let It Go како пее во засолниште, сега е безбедно во Полска.

Малата украинка разговараше со репортер на Би-Би-Си. „Во прифатилиштето бев добро, таму имаше и други деца. Таму беше и мојот соученик Артиом“, изјавило веселото девојче за новинарите.

Ја прашал и што најмногу ѝ се допаѓа во цртаниот филм Frozen, чиј саундтрак го пеела во засолништето.

20:28 Мешков: Влезот на Украина во НАТО би го означил почетокот на војната

Ако Украина стане членка на НАТО, тоа ќе значи војна меѓу НАТО и Русија, само прашање е дали Северноатлантската алијанса е подготвена за тоа, изјави денеска рускиот амбасадор во Франција Алексеј Мешков.

– Во документите на Украина стои дека се подготвени да го освојат Крим со сила на оружје. Ако Украина дотогаш стане членка на НАТО, тоа би значело војна меѓу НАТО и Русија. Дали Алијансата е подготвена за тоа? – се запраша Мешков на денешната прес-конференција во Париз.

Зборувајќи за двојно зголемените испораки на западно оружје за Киев, амбасадорот нагласи дека би било подобро Западот да ги додели тие пари за бегалците.

19:40 Во нападот во Киев, со снимателот Фокс беше убиена и 24 годишна украинска новинарка

Набргу откако беше потврдено дека во близина на Киев е убиен снимател на Фокс њуз, пристигна информација дека е убиена и млада украинска новинарка.

Според Скај њуз, станува збор за 24-годишната Александра Кувшинова – Саша, која работи со тимот на Фокс њуз од почетокот на инвазијата на Украина.

Како што претходно објави Фокс њуз, бил погоден автомобилот со новинарите, а во таа прилика загинал нивниот снимател, додека дописникот бил ранет. Сега е објавено дека е убиен и млад новинар, а Sky News јавува и дека дописникот е тешко повреден и дека во нападот ја изгубил дел од ногата.

19:01 ВИДЕО | Додик: Јас не го водам процесот на отцепување, не сум руски човек

Пратениците на Европскиот парламент имаа голем број прашања до членовите на Претседателството на Босна и Херцеговина и лидерите на ХДЗ БиХ, но цел на критики беа членот на претседателството на српската БиХ, Милорад Додик и лидерот на ХДЗ, Драган Човиќ.

Мишел Галер, член на Парламентот на ЕУ, го праша Додик за што разговарал со рускиот министер за надворешни работи Сергеј Лавров и дали ќе биде „признаен регионот на Бања Лука, како Доњецк и Луганск“. Тој го прашал Човиќ што очекува од Хрватите кога е толку поврзан со Додик, кој е поврзан со Путин, пренесува Српскаинфо.

Dodik: Nisam pod ruskim uticajem, pričao sam sa Lavrovim, ništa skriveno, želim za moju republiku da dogovorim dovoljne količine nafte. Isto radimo kao i vaši prvaci, predstavnici, da obezbjednim dovoljno energenata, za detalje pitajte obavještajnu službu #EU #BiH pic.twitter.com/mShj97iDlL

— TV N1 Sarajevo (@N1infoSA) March 15, 2022

18:12 Русија обвини дека украинските националисти држат како заложници преку 7000 државјани на различни земји

Русија обвинува дека украинските националисти држат како заложници 7.070 луѓе од 22 земји.

„Украинските националисти држат како заложници 7.070 луѓе од 22 земји, како и екипажот на 70 странски бродови кои се блокирани во поморските пристаништа во Украина“, изјави шефот на Националниот центар за одбранбена управа на Русија, генерал полковник Михаил Мизинцев.

Тој изјави дека украинските власти, како и досега, не реагираат на апелот на странските граѓани да ги спасат своите сонародници.

17:17 Американски снимател убиен во Украина

Снимателот на американскиот Фокс њуз, чиј идентитет засега не е познат, е убиен во Украина, пренесе агенцијата АФП.

Се огласија и од Фокс њуз објавувајќи дека нивниот снимател Пјер Закржевски загинал во Украина. Закржевски бил убиен кога автомобилот во кој се наоѓал наишол на отворен оган, а во истиот инцидент бил повреден дописникот на Фокс Бенџамин Хол.

– Пјер беше наш воен известувач кој помина низ Ирак, Авганистан и Сирија. Беше во Украина од почетокот на февруари, изјави извршната директорка на Фокс Њуз, Сузан Скот.

#BREAKING Fox News cameraman killed in Ukraine: network pic.twitter.com/kzHJbIzw5i

— AFP News Agency (@AFP) March 15, 2022

16:17 НАТО стравува од исцениран хемиски напад од страна на Русија во Украина

Министрите за одбрана на НАТО членките утре ќе одржат нов вонреден состанок во Брисел, тие ќе разговараат за предизвиците од руската воена операција и опасноста по земјите членки на Алијансата, јави дописничката на МИА од Брисел.

Едно од прашањата кои редовно се појавуваат во јавноста во последните денови е можноста од напад со хемиско оружје. Русија обвинува дека Украина развива таков вид на оружје, но за НАТО ова се обиди за дезинформација, како и можност Москва да исценира лажен напад од страна на Украина, со што би оправдала нова руска офанзива.

Генералниот секретар на НАТО, Јенс Столтенберг, попладнево предупреди дека ваков чекор би довел до силен одговор од страна на Северноатлантската алијанса.

13:57 Руското обвинителство бара 13 години затвор за Навални

Руското обвинителство денеска побара 13 години затвор за опозицискиот лидер Алексеј Навални во случајот „измама” и „навреда на судот”.

Навални веќе отслужува затворска казна од две и пол години.

Обвинителката Надежда Тихонова побара 13-годишна затворска казна, пренесоа руските новински агенции.

Од 16 февруари, на 45-годишниот Навални му се суди во затворскиот комплекс, кој се наоѓа на 100 километри источно од Москва.

Истражните органи го обвинуваат за проневера на милиони рубљи во вид на подароци дадени на неговите антикорупциски организации, и поради „навреда на судот” за време на едно од неговите претходни рочишта.

13:39 Паб посветен на Хемингвеј уништен во рускиот напад на Харков

„Никогаш нема да пиеш сам“ беа зборовите кои висеа над барот во „Олд Хем“, популарен паб во источниот украински град Харков.

Пабот е именуван по Ернест Хемингвеј, а посетителите поминувале покрај статуата на легендарниот американски писател додека влегувале во него.

Местото било популарно меѓу младите креативци во градот, а Серхи Жадан, еден од најпознатите поети во Украина, често настапувал и пиел во пабот.

Но, сега „Олд Хем“ е во урнатини.

Тој беше целосно уништен за време на руското гранатирање на градот. Обвинителството во Харков соопшти дека две лица загинале во нападот.

13:01 Зеленски до Европа: Ќе си помогнете себеси ако ни помогнете нам

Европа мора да ја заштити сопствената безбедност помагајќи и на Украина да се одбрани од Русија, изјави украинскиот претседател Володимир Зеленски на состанокот на лидерите на Здружените експедициски сили во Лондон преку видео врска во вторникот, повикувајќи ги да испратат повеќе оружје, пишува Ројтерс.

Британскиот премиер Борис Џонсон е домаќин на самитот на нордиските и балтичките лидери на кој ќе се разговара за европската одбрана и безбедност.

„Сите ние сме цел на Русија и сè ќе оди против Европа ако Украина не издржи, затоа би сакал да ве замолам да си помогнете со тоа што ќе ни помогнете“, им рече Зеленски на лидерите.

11:58 Исчезна руската новинарка која протестираше среде емисија

Руската новинарка Марина Овсијаникова, која упадна во програма во живо на руската телевизија „Прв канал“, за да протестира против војната во Украина е пријавена за исчезната во текот на ноќта, пишува Би-Би-Си.

Овсијаникова, уредничка на „Прв канал“, кој е под државна контрола, беше приведена откако вчера се појави со антивоен знак.

A woman burst onto Russia’s main live evening newscast today with a sign that says:

“Stop the war
Don’t believe propaganda
They’re lying to you”

And chanting: “Stop the war! No to war!”pic.twitter.com/pKVKZFVEM3

— max seddon (@maxseddon) March 14, 2022

11:57 САД воведоа санкции против уште 11 високопоставени функционери на руското Министерство за одбрана

Американскиот Стејт Департмент воведе санкции уште против 11 високопостаени функциониери на руските оружени сили и на капацитети од воено-индустрискиот комплекс.

На листата се впишани началникот на Руската национална гарда, Виктор Золотов, шефот на Руската федерална служба за воено-техничка соработка, Дмитри Шугајев, генералниот директор на „Рособоронекспорт”, Александер Михејев, како и осумина заменици-министри во руското Министерство за одбрана.

„Светот застрашено гледаше како Русија изврши смислен, неиспровоциран и неоправдан напад врз Украина. Продолжената инвазија значи сериозни казни за руските воени лидери. Наведените 11 индивидуи се посочени како лица што раководат или раководеле во одранбениот сектор или на до него блиски стопански капацитети”, се наведува во соопштението на Стејт Департментот.

11:53 Според ОН од Украина досега побегнале три милиона лица

Досега околу три милиона лица побегнале од Украина од почетокот воената инвазија на Русија врз оваа земја, на 24 февруари, пресмета Агенцијата на ОН за бегалци, давајќи најновите информации за бројот на украински бегалци од војната.

„Вкупно 2,95 милиони Украинци ги напуштија своите домови, а 1,8 милиони влегоа во Полска. Други отпатуваа во Унгарија, Романија и Словачка”, наведува Агенцијата.

УНХЦР потврди дека од почетокот на конфликтот 73.000 деца од Украина станале бегалци.

Околу 300.000 од овие украински бегалци веќе влегле во Западна Европа

11:41 За еден ден 89.000 Британци се пријавиле за да згрижат украински бегалци

Британската Влада ја пушти во употреба страницата „Домови за Украина”, за сите оние кои сакаат да им бидат домаќини на бегалци, а 89.000 лица се пријавија уште првиот ден, јави Би-Би-Си.

Секретарот за домување и заедници, Мајкл Гов смета дека Велика Британија има историја на „поддршка за најранливите за време на нивните најтемни часови”.

На секое домаќинство што ќе згрижи бегалец, ќе му бидат понудени 350 фунти месечно, без данок. Од домаќините нема да се очекува да обезбедат храна и трошоци за живот, но, тие може да изберат да го понудат тоа.

Луѓето што сакаат да понудат простор од својот дом, без плаќање кирија, или пак, посебна резиденција, за најмалку шест месеци, можат да го сторат тоа на интернет.

Како што е предвидено, бегалците ќе имаат пристап до здравство и други јавни услуги. Децата ќе ги следат часовите во локалните училишта.

11:35 Руски ракети ја уништија пистата на регионалниот аеродром во Днипро

Руските сили истрелаа ракети врз главниот цивилен аеродром во источниот украински регион Днипро во текот на ноќта, уништувајќи ја нејзината писта и оштетувајќи ја зградата на терминалот, изјави во вторникот регионалниот гувернер Валентин Резниченко, јави Ројтерс.

„Ќе биде потребно многу време да се опоравиме. Ќе победиме!“, рече тој во објавата на интернет.

⚡️Russian missiles damage airport in Dnipro.

Two missiles hit the Dnipro airport on the night of March 15, destroying a runway and damaging a terminal, according to Dnipropetrovsk Oblast Governor Valentyn Reznichenko.

— The Kyiv Independent (@KyivIndependent) March 15, 2022

11:27 Тројца европски премиери на посета во Киев ќе ја дадат својата поддршка за Украина

Премиерите на Чешка, Полска и на Словенија денеска ќе патуваат за Киев, каде треба да се сретнат со претседателот Володимир Зеленски, како претставници на лидерите на Европската унија. Информацијата утрово беше објавена на социјалните мрежи, од страна на чешкиот премиер Петр Фијала.

– Целта на посетата е да се потврди недвосмислената поддршка на целата Европска унија за суверенитетот и независноста на Украина, појасни Фијала.

Друга цел на посетата, додаде тој, е и да се претстави широк пакет поддршка за Украина и Украинците.

Помошникот на Моравјецки, Михал Двочик, им изјави на новинарите дека делегацијата ја преминала полско-украинската граница и се упатувала кон Киев со воз, во, како што рече полскиот лидер, историска мисија.

11:21 Околу 350.000 луѓе сè уште се блокирани во Мариупол

Околу 350.000 луѓе сè уште се заробени во Мариупол, кој е под опсада на руските сили од 1 март, соопштија локалните власти.

Со оглед на тоа дека градот има 540.000 жители, а околу 150.000 луѓе евакуирани во првите три дена кога тоа беше сè уште безбедно, проценуваме дека околу 350.000 луѓе се заглавени во Мариупол, изјави советник на градоначалникот на Мариупол, Петро Андриушченко.

Изминатите денови пропаднаа повеќе обиди за воспоставување безбедни коридори и евакуација на цивили од Мариупол.

Голем конвој со хуманитарна помош што требаше да пристигне во недела сè уште не стигнал во градот.

11:07 Кличко воведе полициски час во Киев до 17 март

Се воведува забрана за движење во Киев без посебни пропусници од 20 часот денеска до седум часот на 17 март, објави градоначалникот на Киев, Виталиј Кличко на својот Телеграм канал.

– Согласно одлука на воената команда од денеска – 15 март, од 20 часот, во Киев се воведува полициски час. Забрането е движење низ градот без посебни пропусници. Може да се излезе само за да се стигне до засолниште. Полицискиот час ќе биде во сила до седум часот на 17 март, напиша Кличко.

A curfew is announced in #Kyiv from 8 p.m. on March 15 to 7 a.m. on March 17.

This was announced by the mayor Vitaly #Klitschko.

It is prohibited to move around the city without a special pass. It is possible to go out only to go to the shelter. pic.twitter.com/uXs8qHIyKI

— NEXTA (@nexta_tv) March 15, 2022

10:45 ЕУ ја одобри новата рунда санкции врз Русија насочени кон енергијата, челикот и одбранбениот сектор

Европската унија официјално ги одобри новите санкции против Русија поради нејзината инвазија на Украина, кои вклучуваат забрани за инвестиции во рускиот енергетски сектор, извоз на луксузни стоки и увоз на производи од челик од Русија.

Санкциите, кои стапуваат на сила по објавувањето во официјалниот весник на ЕУ, што ќе се случи во текот на денот, исто така ги замрзнуваат средствата на повеќе деловни лидери кои ја поддржуваат руската држава, вклучувајќи го и сопственикот на фудбалскиот клуб Челзи, Роман Абрамович.

Европската комисија во соопштението соопшти дека санкциите вклучуваат „далекосежна забрана за нови инвестиции во рускиот енергетски сектор“.

Мерката ќе ги погоди руските нафтени гиганти Роснефт, Транснефт и Газпром, но членките на ЕУ сепак ќе можат да купуваат нафта и гас од нив, изјави извор од ЕУ за Ројтерс.

Ќе има и целосна забрана за трансакции со некои руски државни претпријатија поврзани со воено-индустрискиот комплекс на Кремљ, рече извршниот директор на ЕУ.

10:36 Украина сака да воспостави девет хуманитарни коридори за бегство

Украинските власти денеска изразија надеж дека ќе спасат уште повеќе цивили од нападот на руската војска, со тоа што ќе воспостават девет хуманитарни коридори за бегство, јави ДПА.

Меѓу нив е и нов обид за евакуација на опколениот пристанишен град Мариупол.

-Од Бердјанск, на околу 70 километри, конвој со тони помош, повторно се обидува да стигне до тешко оштетениот град, изјави вицепремиерката Ирина Верешчук.

10:07 Европа мора да се подготви за најголемиот мигрантски бран после седум години

Европа мора да се подготви за вториот најголем мигрантски бран после седум години, бидејќи во спротивно се заканува хаос, предупредува експертот по миграции, Гералд Кнаус.

Кнаус за австрискиот весник „Клајне цајтунг” вели дека војната во Украина предизвикала огромен бран бегалци што за само две седмици го надминал вкупниот број бегалци за време на воените судири при распадот на поранешна Југославија.

Тој укажува дека споредбено со мигрантскиот бран од 2015 година голема предност е тоа што овојпат ЕУ делува единствено и не мора да се чека на одобрување од државите-членки. Меѓутоа нагласува дека е потребно одлучно дејствување со соодветна поддршка на населението.

Кнаус вели дека е неопходна организација на активностите за прифат на бегалците бидејќи доколку не се успее во префрлањето на луѓето во подрачјата каде е декларирана подготвеност за нивен прифат повторно се заканува хаотична ситуација.

10:04 Авионот на Абрамович слета во Москва, олигархот го префрла имотот на безбедно поради санкциите

Приватен авион во сопственост на санкционираниот руски олигарх Роман Абрамович рано утринава слета во Москва, откако претходно по кратко застанување полетал од Истанбул, покажуваат податоците на веб-страницата „Флајтрадар24“.

Авионот на Абрамович, сопственик на британскиот клуб „Челзи“, пристигнал вчера од Израел во Истанбул, набргу откако бил виден на аеродромот „Бен Гурион“ во Тел Авив, пренесува Ројтерс.

Абрамович е меѓу седумте руски милијардери додадени на британската листа со санкции минатата недела, како дел од напорите на официјален Лондон да го изолира рускиот претседател Владимир Путин поради рускиот напад врз Украина.

Ројтерс наведува дека Абрамович има и израелско и португалско државјанство и дека тој постојано негирал дека има блиски врски со рускиот претседател Путин.

09:53 Британците тврдат дека Рускиот план за инвазијата не функционира

Рускиот план за нападот не функционира, изјави за Би-Би-Си, британскиот министер за надворешни работи Џејмс Клеверли.

– Требаше да биде многу лесно, требаше да биде некаква молскавична војна каде руските војници ќе ја преплават Украина, истакна Клеверли.

Но, наместо тоа, „она што го гледаме е жестока украинска одбрана, што е неверојатно фрустрирачки за Владимир Путин”, смета британскиот министер.

Запрашан дали војната ќе заврши до мај, како што наведуваат некои украински официјални лица, Клеверли одговори дека „неверојатно тешко” е да се прават такви предвидувања. Но, како што нагласи министерот, Велика Британија мора да се погрижи Путин да не успее во Украина.

09:32 Зеленски: Русија за 19 дена загуби повеќе отколку во двете војни во Чеченија

Претседателот на Украина, Володимир Зеленски во синоќешното обраќање до граѓаните истакна дека бранителите продолжуваат да „нанесуваат катастрофални загуби на руските сили”.

Тој додаде дека бројот на соборени хеликоптери во Русија наскоро ќе достигне стотици.

– Тие веќе изгубија 80 борбени авиони, стотици тенкови и илјадници друга опрема. За 19 дена, руската армија во Украина загуби повеќе отколку во двете крвави и долготрајни војни во Чеченија, истакна Зеленски.

08:51 Јапонија ги замрзна имотите на уште 17 Руси, вклучувајќи и милијардер

Јапонија одлучи да ги замрзне имотите на уште 17 руски физички лица, со што вкупниот број на санкционирани Руси се искачи на 61, соопшти Министерството за финансии, пренесува Ројтерс.

Чекорот беше преземен откако САД во петокот воведоа санкции за мноштво руски поединци, вклучително и милијардерот Виктор Векселберг и 12 членови на Думата, долниот дом на рускиот парламент.

Векселберг исто така беше цел на санкциите на Јапонија, како и 11 членови на Думата и пет членови на семејството на банкарот Јуриј Ковалчук, соопшти Министерството за финансии.

Јапонија ќе дејствува во согласност со другите земји од Групата седум (Г7) за санкциите, изјави високиот владин портпарол Хироказу Мацуно.

„Што се однесува до санкциите во иднина, ние ќе продолжиме да ги следиме условите и, заедно со другите земји од Г7, ќе одговориме соодветно“, рече Мацуно на новинарите на прес-конференција.

08:34 Запленета јахта на руски олигарх во Шпанија, вредна 140 милиони долари

Шпанските власти привремено ја запленија јахтата на рускиот олигарх Сергеј Чемезов, сојузник на рускиот претседател Владимир Путин.

Чемезов е поранешен офицер на КГБ кој раководи со државниот конгломерат Ростек.

Суперјахтата Валери, долга 85 метри и вредна 140 милиони долари e запленета во Барселона. Бродот пловеше под знамето на Свети Винсент и Гренадини. Бродот е регистриран на поќерката на Чемезов, Анастасија Игнатова, преку компанија од Британските Девствени Острови.

08:21 Русија нема се соочи со недостиг на храна, вели вицепремиерката Абрамченко

Русија соопшти дека нема ризик од недостиг на храна на домашниот пазар и ги предупреди потрошувачите да не брзаат да складираат основни производи откако Западот воведе санкции кон Русија поради нејзината инвазија на Украина.

Руската економија се соочува со најтешката криза од падот на Советскиот Сојуз во 1991 година, откако САД и Европа ја отсекоа Русија од деловите на глобалната економија поради инвазијата на Украина на 24 февруари од Москва, пишува Ројтерс.

„Нема услови за ризик од недостиг или за намалување на асортиманот на производи“, рече вицепремиерката Викторија Абрамченко во изјавата.

08:00 Војната би можела да заврши до мај, оценува советникот на Зеленски

Војната во Украина треба да заврши до мај, бидејќи Русија ќе остане без ресурси за продолжување на инвазијата, тврди советникот на украинскиот претседател Олексеј Арестович.

Повикувајќи се на видео објавено од неколку украински медиуми, Ројтерс известува дека Арестович вели дека точниот момент ќе зависи од тоа колку пари Кремљ е подготвен да посвети на воената кампања, пренесува Н1.

– Мислам дека треба да имаме мировен договор најдоцна во мај, на почетокот на мај, можеби многу порано, ќе видиме, зборувам за најновите можни датуми, рече Арестович.

– Сега сме на крстопат: или ќе се постигне мировен договор многу брзо, во рок од една или две недели, со повлекување на војниците и сè друго, или ќе се обидат да донесат некои, да речеме Сиријци за вториот круг и, кога и нив ќе ги сомелеме, ќе се постигне договор, било да е тоа до средината на април или крајот на април, рече тој.

07:59 Москва: Русија ги контролира нуклеарните централи во Чернобил и Запорожје

Руската војска ја контролира ситуацијата во нуклеарната централа заедно со украинското обезбедување и нејзините вработени, изјави претставникот на Министерството за надворешни работи на Русија, Алексеј Полишчук.

Како што рече, двете електрани работат во нормален режим и радијацијата е нормална, што го потврдуваат и од Меѓународната агенција за атомска енергија.

„Главната задача сега е да се спречат какви било провокации насочени кон работата на овие нуклеарни централи од страна на украинските националистички сили”, рече тој.

07:55 САД тврдат дека Русија од Кина побарала проектили, дронови, оклопни возила…

САД ги информираа своите сојузници дека Русија побарала од Кина воена опрема, вклучувајќи ракети, беспилотни летала и оклопни возила, и дека Кина „одговорила позитивно” на барањето, пишува „Фајненшл тајмс”.

Од дипломатската депеша што ја испратила САД не е јасно дали Кина веќе ја испратила помошта или едноставно се обврзала да го стори тоа, додава Фајненшл тајмс.

Меѓу барањата на Русија се и готовите воени оброци, изјавија претходно два извори за Си-Ен-Ен.

Еден од нив сугерираше дека храната би можела да биде барањето на кое Кина би можела да се согласи бидејќи тоа не е дел од помошта на која Западот би можел да реагира.

07:52 Нов закон во Русија им овозможува на руските авиокомпании да ги задржат авионите изнајмени во странство

Сè уште не се знае што ќе биде со стотиците авиони што руските авиокомпании ги изнајмија од странски компании, откако рускиот претседател Владимир Путин потпиша закон со кој им се дозволува на компаниите да ги регистрираат тие авиони и да продолжат да летаат со нив.

Руските државни медиуми објавија дека новиот закон ќе им овозможи на руските авиокомпании да ги користат тие авиони во Русија, пренесува Бета.

Некои од тие авиони биле изнајмени и од Ирска, членка на Европската унија.

Минатиот месец ЕУ забрани продажба и рентање авиони на Русија, што е дел од санкци те воведени кон Русија поради инвазијата на Украина. Компаниите добија рок до 28 март да ги раскинат сите договори со руската страна.

07:49 Повеќе од 2.000 цивили загинаа во Мариупол, соопштија украинските власти

Повеќе од 2.000 цивили досега се убиени во окупираниот украински пристанишен град Мариупол, соопштија утринава локалните власти, пренесува ДПА.

Од почетокот на руската инвазија на Украина на 24 февруари, загинаа 2.357 луѓе”, соопшти градскиот совет на Мариупол.

Југоисточниот украински град со околу 400.000 жители со денови е под опсада на руските војници и отсечен од остатокот од земјата.

Украинските власти известија за силни воздушни напади врз градот на Азовското Море. Русија вели дека напаѓа само воени цели таму.

Мариупол многумина го сметаат за симбол на украинскиот отпор. Од почетокот на војната во регионот Донбас во источна Украина во 2014 година, градот одбрани неколку обиди на проруските сепаратисти да ја преземат власта, пренесува ДПА.

Советникот на градоначалникот на Мариупол, Петро Андриушченко, ја нарече ситуацијата во градот „нехумана”.

07:46 Ванг Ји: Кина „не е страна” во конфликтот во Украина

Кинескиот министер за надворешни работи Ванг Ји рече дека неговата земја „не е страна” во војната во Украина по руската инвазија, пренесува ДПА.

Во телефонскиот разговор со шпанскиот колега Хозе Мануел Албарес, Ванг порача дека неговата влада „не сака санкциите да влијаат на Кина”, се вели во денешното соопштение на кинеското Министерство за надворешни работи.

Пекинг во принцип ги отфрла санкциите и „Кина има право да ги заштити своите легитимни права и интереси”, рече тој.

Тој го нарече конфликтот во Украина „производ на акумулација и интензивирање на европските безбедносни противречности низ годините”.

07:10 Бајден: Путин и пандемијата се виновни за рекордната инфлација во САД

Американскиот претседател Џо Бајден изјави вчера дека рускиот претседател Владимир Путин и пандемијата на ковид се причините за рекордната инфлација во САД и додаде дека зголемувањето на цената нема никаква врска со политиката на неговата администрација, пренесе Фокс њуз.

„Знаеме дека американските семејства се борат со зголемените цени. За да биде јасно зошто цените сега се високи, постојат две причини. Првата е поради начинот на кој функционира глобалната економија. Пандемијата направи бројни прекини во синџирот на снабдување, а синџирот на снабдување е многу важен, бидејќи материјалот доаѓа од целиот свет”, рече Бајден.

Како втора причина тој го наведе својот руски колега.

07:00 Украина бара оружје за да спречи нова светска војна

Доставете ни го сето неопходно оружје. Воведете уште повеќе санкции за Русија и изолирајте ја целосно. Помогнете ѝ на Украина да го притисне Путин во неуспех и така ќе избегнете уште поголема војна, изјави шефот на украинската дипломатија

Украинските власти им порачаа на западните партнери да им дадат воена помош, а не да се воздржуваат од вклучување во конфликтот, ако сакаат да избегнат нова светска војна.

– Украина возвраќа успешно. Потребни сте ни да ни помогнете да се бориме. Доставете ни го сето неопходно оружје. Воведете уште повеќе санкции за Русија и изолирајте ја целосно. Помогнете ѝ на Украина да го притисне Путин во неуспех и така ќе избегнете уште поголема војна – изјави шефот на украинската дипломатија Дмитри Кулеба.