Поради корона-кризата и вонредната состојба, минатиот месец фабриките работеле со 65,5 отсто од полниот капацитет. Oбезбеденоста на производството со порачки во јуни 2020, во однос на мај 2020 година, е понеповолна, а такви се и очекувањата за обемот на производството во наредните три месеци. Залихите на готовите производи се намалени, предупредуваат раководителите на деловните субјекти, кои учествувале во анкетата на Државниот завод за статистика.

– Во индустријата на мебел досега има пад на прометот од над 50 отсто, а овој тренд ќе продолжи, најверојатно и со поголеми негативни ефекти до крајот на годинава поради одлуката за намалување на непродуктивните расходи од државниот буџет за цела 2020 година, како и нефункционирање на пазарот наменет за туризмот, угостителството, хотелиерството – вели Драги Милошевски, претседател на Здружението на дрвната и графичката индустрија и издавачката дејност, АД „Киро Дандаро“ – Битола.

Милошевски вели и дека намалувањето на производството во графичката и издавачката дејност е над 60 отсто, бидејќи компаниите ги сведоа на минимум рекламните флаери и други печатени материјали.

– Заживување се почувствува во мај и во дел од јуни, но со многу помал капацитет од минатата година овој период – објаснува Милошевски.

Менаџерите посочиле дека најголемо влијание врз ограничувањето на обемот на производството е губењето на странските пазари, односно недоволната странска побарувачка (20,6 проценти). Голем удел во ограничувањето на производството имаат и недостигот на квалификувана работна сила (17 проценти), неизвесното економско опкружување со 16,5 проценти и недоволната домашна побарувачка со 13,1 проценти.

– Периодот на кризата поради ковид-19, металната и електроиндустријата го минуваат со намалено работење, пред сѐ поради намалените нарачки, намалениот број вработени поради превенција, карантин и немање нови проекти. Падот во обемот на работењето е за 20 до 30 отсто. Падот на производството, услови и пад на извозот поради одложување на нарачките од странските партнери е резултат на падот на светската побарувачка – вели Орце Давчев, претседател на Здружението на металната и електроиндустријата, „Брако“ ДОО – Велес.

Менаџерите оценуваат дека економската состојба на деловните субјекти во јуни 2020 година е понеповолна во однос на претходниот месец, а понеповолна и во однос на јуни 2019 година. Се очекува бројот на вработените да се зголеми. Според оценката на раководителите на деловните субјекти, индикаторот на доверба во преработувачката индустрија во јуни 2020 година е намален за 0,8 процентни поени во однос на мај 2020 година.