Македонскиот поет и есеист Санде Стојчевски е добитник на високо меѓународно признание на фестивалот „Поетски ноќи во Куртеа де Арџеш“, Романија. Информацијата за наградата ја објави Фондацијата и организацијата посветени на културата „Orient-Occident International Academy“ од Романија, која е основач и организатор на Меѓународниот фестивал „Поетски ноќи во Куртеа де Арџеш“.

Жири-комисијата, во која членуваат видни романски академици, професори и книжевни критичари, едногласно ја доделило наградата за сеопфатниот опус на Стојчевски.

– Големата меѓународна награда за поезија на првото издание на Фестивалот во 1997 година беше доделена на познатиот поет и прозен писател Михаил Ренџов, легенда на европската и на светската лирска поезија. По 25 години, како знак на почит кон поезијата што е пишувана на македонски и на другите јазици од балканските земји, дојде ред на уште еден македонски поет, Санде Стојчевски, да го прими нашето значајно признание. Оваа награда е мотивирана од извонредните квалитети на делото на Стојчевски, поет и високо рангиран толкувач на лирската поезија. Санде Стојчевски е длабок глас на современиот универзален лиризам – истакнато е во образложението на комисијата.

Големата меѓународна награда за поезија на Санде Стојчевски ќе му биде врачена на годинашното 25-то издание на Меѓународниот фестивал „Поетски ноќи во Куртеа де Арџеш“, кое ќе се одржи од 15 до 20 септември 2021 година.

(Текстот е објавен во „Културен печат“ број 94, во печатеното издание на „Слободен печат“ на 21-22 август 2021)