ВИДЕО: Први победи за Баерн, Барселона, Жалгирис и Макаби во Евролигата
Во германскиот дуел кошаркарите на Баерн победија вечерва во Минхен против Алба Берлин со 80:68 во натпреварот од првото коло од Евролигата.
Во тимот на Баерн најефикасен беше Силван Франсиско со 17 поени, а Исак Бонга имаше „дабл-дабл“ учинок од 11 поени и 10 скокови. За Алба, по 12 поени запишаа Јоханес Тиман и Луис Олинде.
Кошаркарите на Жалгирис Каунас победија на гости против Виртус Болоња со 82:79. Литванскиот тим го предводеше Кинан Еванс со 25 поени, а во италијанскиот тим доминираше Џордан Мики со 18.
Успешен старт имаше и Барселона која дома со 91:74 го совлада Анадолу Ефес најмногу благодарение на Вили Хернангомез кој се истакна кај Шпанците со 18 поени, а Шејн Ларкин беше прв стрелец во редовите на турската екипа со 16 поени.
Црвена звезда претходно убедливо го надигра составот на Асвел Лион Вилербан, а вториот српски претставник во елитата Партизан загуби од Макаби Тел Авив со 96:81.
За Израелците Лоренцо Браун блескаше со 22 поени (осум асистенции), а на спротивната страна за белградските „црно-бели“ Алекса Аврамовиќ имаше 24 поени.
Евролига, прво коло
Четврток, резултати
Црвена звезда – Асвен Лион Вилербан 94:73
Макаби Тел Авив – Партизан 96:81
Барселона – Анадолу Ефес 91:74
Баерн – Алба Берлин 80:68
Виртус Болоња – Жалгирис Каунас 79:82