Кошаркарите на Партизан ја совладаа Црвена звезда со 70:67 во третиот натпревар од финалето во АБА лигата и така го намалија водството на „црвено-белите“ на 2:1 во серијата.

Во салата „Александар Николиќ“ исполнета само со навивачи на Партизан, играчите на Жељко Обрадовиќ до победата беа предводени од Кевин Пантер со 22 поени, а го следеа Алекса Аврамовиќ со 14 и Далас Мур со девет поени.

Најефикасен во редовите на поразениот тим беше Огњен Добриќ со 20 поени, додека Дејан Давидовац постигна 17.

Имаше инцидент поради кој беше прекинат мечот на 57 секунди до крајот, при водство на „црно-белите“ со 68:65. Судиското триото во состав Матеј Болтаузер, Урош Николиќ и Милан Недовиќ, го напушти паркетот бидејќи навивачите на Партизан фрлаа запалки и мобилни телефони во теренот.

Кога беа испразнети делови од трибините зад тунелот и зад кошот каде што ги напаѓаа играчите на Црвена звезда, натпреварот продолжи по пауза од 50 минути поради прекин.

Во петок од 18.30 часот на програмата ќе биде четвртиот натпревар од финалната серија на АБА лигата, а домаќин повторно ќе биде Партизан. Евентуалната „мајсторка“ ќе биде во понеделник на 6 јуни.