Женската одбојкарска репрезентација на Србија ја одбрани титулата светски шампион, откако во финалето на Светското првенство го совлада Бразил со 3:0 (26:24, 25:22, 25:17). За Србија ова е второ злато, а за Бразил четврто сребро. Србинките не само што ја освоија титулата светски првак вторпат по ред, туку тоа го направи без пораз и оваа генерација на одбојкарки покажа дека е навистина посебна.

Србија во првите два сета тргна од негатива. Во првиот имаше многу грешки, кои Бразилките ги искористија и поведоа со 4:1. Но, Србинките брзо се вратија, воспоставија резултатска рамнотежа, а потоа постепено ја преземаа контролата на првиот сет кој го добија со 26:24.

Во вториот Бразилките повторно добиваат голема предност на теренот. Габи сервираше одлично, а јужноамериканската репрезентација стигна до „плус четири“ (6:2). Постепено Србија се враќаше и израмни на 12:12. Но, ниту Бразилките не се предадоа, па уште еднаш дојдоа до големи три поени предност – 16:13.

А потоа на сцена стапува Јована Стевановиќ. Со одлични сервиси, со помош на блокови на Мина Поповиќ и одлични напади на Тијана Бошковиќ, Србија освојува седум поени во низа и доаѓа до пресврт – 20:16. Бразил повторно се врати и влезе во самата завршница од сетот со резултат 22:22. Сепак, Србија со неодбранливите напади на Тијана Бошковиќ врза три поени за освојување и на вториот сет – 25:22.

За разлика од првите два сета, во третиот Србија реши да не стартува од негатива. Избраничките на Даниеле Сантарели со голема концентрација пристапија кон мечот и поведоа со 7:4. Бразил немаше одговор на играта на Србија, а предноста во третиот сет само се зголемуваше која достигна максимални осум поени – 17:9 и до крајот само рутински се одработуваше задачата.

Во победничката селекција повторно одлична беше капитенот Тијана Бошковиќ со 22 поени, а Јована Стевановиќ реализираше 11. На другата страна Ана Каролина да Силва и капитенот Габриела Брага Гимараеш имаа по девет поени.