Најдобриот тим во регуларниот дел од сезоната, Феникс Санс поведе со 2:1 во првото коло од плеј-офот против Њу Орлеанс, шампионот Милвоки бакс оствари убедлив триумф во Чикаго, додека Атланта намали на 1:2 во серијата против Мајами хит.

По двата натпревари на Флорида на кои Мајами доминираше и дојде до две лесни победи, во третиот натпревар од серијата, Атланта на првиот натпревар на домашен терен оствари победа од 111:110 во драматична завршница.

Херој на Атланта беше Тре Јанг кој поените за победа ги постигна на пет секунди до крајот на натпреварот. На спротивната страна, шутот на Џими Батлер со звукот на сирената не беше прецизен.
Освен поените за победа, Јанг ја предводеше и листата на стрелци на Атланта со 24 поени и 8 асистенции.

Одлична партија одигра и Богдан Богдановиќ кој даде 18 поени, а Диандре Хантер постигна 17 поени. Во редовите на Мајами, најдобар беше резервистот Тајлер Хироу со 24 поени и 7 скока. Батлер и Макс Струс дадоа по 20 поени.

Феникс санс кој имаше најдобар скор во регуларниот дел од сезоната, загуби на вториот натпревар на домашен терен, но веднаш го врати брејкот на гости. Феникс со 114:111 славеше над Њу Орлеанс и поведе со 2:1 во победи.

Иако победи со три поени разлика, немаше големи возбудувања во финишот бидејќи предноста на „сонцата“ постојано се движеше од пет до седум поени. Во отсуство на повредениот Девин Букер кај Феникс најдобри беа Диандре Ејтон и Крис Пол кои дадоа по 28 поени. Ејтон имаше и 17 скока, додека Пол запиша 14 асистенции. Интересно е што Феникс дојде до победата иако погоди само четири тријки од 26 обиди.Во редовите на Њу Орлеанс се истакнаа Брендон Инграм со 34 поени и 7 скока и Си Џеј Мекалум со 30 поени и 7 асистенции.

Убедлив настап на гостински терен имаше и шампионот Милвоки бакс кој со 111:81 славеше над Чикаго.Кошаркарите на Милвоки дилемите околу победникот ги решија уште во првата четвртина која ја добија со 33:17 и до крајот на натпреварот не дозволија разликата да се спушти под 14 поени. Во втората четвртина имаа предност од 24 поени (46:22), а во третата и 33 поени (87:54) со што дојдоа до убедлив триумф и поведоа со 2:1 во победи.
Најефикасен во редовите на Милвоки беше Грејсон Ален со 22 поени, Боби Портис даде 18 поени и 16 скока, а Јанис Адетокумпо застана на 18 поени. Најдобар кај „биковите“ беше Никола Вучевиќ со 19 поени.