ВИДЕО | Драган Бјелогрлиќ: Како можам да бидам среќен во несреќно општество, иако сум финансиски обезбеден
Српскиот актер и режисер Драган Бјелогрлиќ гостуваше во емисијата „Неделен впечаток“ каде уште еднаш ја коментираше ситуацијата во Србија и се осврна на критиките што ги добива, а во кои често му велат дека нема право да протестира бидејќи е финансиски обезбеден.
Бјелогрлиќ неодамна дури беше обвинет од таблоидите дека физички го нападнал водителот на емисијата, што и двајцата го демантираа. Во емисијата Бјелогрлиќ го кажа својот став околу ситуацијата во општеството и објасни дали е тој среќен човек.
„Каква е дефиницијата и од која позиција дефинираме дека сега кога сум финансиски обезбеден треба да бидам среќен човек? Како можам да бидам среќна личност во несреќно општество. Како? Моите деца треба да растат и да живеат во истото несреќно општество. И сега кога се решив, треба да молчам и да се грижам за мојата работа. Дали е тоа пораката?“, праша Бјелогрлиќ.
Во исечокот од емисијата кој кружи на социјалните мрежи тој продолжува со своето објаснување во кое вели дека не сака да молчи за неправдите и дека добива коментари како, „Ти дадовме работа – молчи“.
Бјелогрлиќ истакна дека во текот на својата кариера се борел за тоа што го работи и дека токму затоа има резултати.
„Прво, не ми дадовте да работам – се борев за моето право на работа и бидејќи си ја работам работата најдобро поради мојата способност и за тоа, фала богу, имам резултати и на кого да бидам благодарен? И треба, претпоставувам, да изразам благодарност со моето молчење. Со тоа што не протестирам. Толку е откачено и болно што никој не смее да го праша тоа прашање. Какви се тие аршини? Па што? Само тие што немаат можат да протестираат?“, праша на крајот.