ВИДЕО: Дебакл на МЗТ Скопје Аеродром, Партизан славеше со 53 коша разлика
Никако да запре негативната серија на МЗТ Скопје Аеродром во АБА лигата откако го претрпе и седмиот пораз во низа. Македонскиот шампион во српскиот главен град беше убедливо поразен од Партизан со 53 коша разлика или со конечен резултат 120:67.
Единствено на почетокот од првата четвртина водеа „металците“ (0:2, 2:4), а потоа белградските „црвено-бели“ почнаа да доминираат на паркетот и докажат зошто се големи фаворити на овој меч.
Ривалите веднаш стекнаа двоцифрена предност (21:11), а првите 10 минути на натпреварот ги добија со 29:15. Во втората четвртина само растеше негативата на играчите на Драган Николиќ, домаќинот пред паузата имаше и највисоки „плус 23“ (54:31).
Веќе се знаеше победникот, прашање беше само со колкава разлика МЗТ ќе загуби на крајот, по третата четвртина Партизан водеше со 84:51, а највисоките „плус 53“ беа поставени во самиот финиш од средбата во „Штарк“ арената.
Смаилагиќ беше прв стрелец за Партизан со 24 поени, а на спротивната страна за МЗТ Стојановски беше најефикасен со 16 поени.
Партизан се врати на првото место на табелата со 28 бодови, еден повеќе од второпласираната Црвена звезда која има меч помалку. МЗТ останува на последното 14 место со 17 бодови.