Фудбалскиот менаџер на Астон Вила, Унаи Емери, го продолжи договорот со тој клуб до 2027 година, потврдија денеска од англискиот клуб. Емери на клупата на Астон Вила седна во ноември 2022 година кога го наследи Стивен Џерард.

Тој водеше тим кој беше на работ на испаѓање на моментално четвртото место во Премиер лигата и е во трка за едно од местата кои водат следната сезона во групите на Лигата на шампионите.

Воедно Астон Вила се пласираше во полуфиналето на Конференциската лига каде ќе игра против грчкиот Олимпијакос.

– Одиме напред заедно со навивачите на Вила, сопствениците на клубот, управниот одбор и оваа група играчи со кои се гордееме – изјави 52-годишниот Емери.

Поранешниот тренер на Севиља, ПСЖ и Арсенал неодамна се споменуваше меѓу потенцијалните наследници на Томас Тухел во Баерн Минхен.