Инсталацијата „Крешендо“ беше поставена на плоштадот „Магнолија“ во Битола во раните утрински часови на 22 август 2022 година. Таа ќе стои на плоштадот до нејзиното затворање на 25 август 2022 година.

Во склоп на инсталацијата секои два часа се вклучува авторска музика со исто име „Крешендо“, компонирана наменски за оваа пригода, која се слуша на целиот плоштад и така дава целосна слика за идејата на изложбата.

Уметничката инсталација „Крешендо“ е темпорален мултимедијален проект, во кој се синтетизирани вајарството, графиката и музиката. Проектот е замислен како директно присуство на уметноста во центарот на градот. Негова цел е да оствари директна интеракција со минувачите на определена локација.

„Крешендо“ треба да го акцентира креативниот импулс на Битола, со помош на светлосен, ликовен, музички и скулпторски израз и да биде еден вид мисловна временска машина, потсетник на нашето битисување овде и сега и копнеж по духовното.

Инсталацијата „Крешендо“ е заеднички мултимедијален проект на графичарот Владо Ѓоревски, вајарот Владимир Симоновски и музичарот Александар Гулевски.

Автор на фотографиите од инсталацијата со дрон е Агим Џело.