Француската модна куќа „Балман“ (Balmain) остана без парчиња од новата колекција која требаше да биде претставена на ревија во Париз кон крајот на овој месец, пишува „Ројтерс“ (Reuters).

Имено, камионот што ја превезувал облеката бил украден, а креативниот директор Оливие Рустинг ја споделил веста за кражбата на својот инстаграм профил.

Рустинг во објава на Инстаграм вели дека крадците заплениле возило со околу 50 предмети од новата колекција на „Балман“ додека возачот ги превезувал парчињата од аеродромот до седиштето на брендот во Париз.

„Ова е толку неправедно. Јас и мојот тим работевме напорно“, напиша меѓу другото Оливие.

Според Ројтерс, возачот на камионот не бил повреден.

„Балман“ треба да ја претстави својата колекција пролет-лето 2024 година на 27 септември за време на модната недела во Париз, каде што своите колекции исто така ќе ги претстават и „Луј Витон“, „Диор“, „Шанел“ и „Хермес“. Портпаролот на „Балман“ потврди дека шоуто во Париз ќе се одржи, одбивајќи да го коментира грабежот додека не заврши истрагата.