Убиените Швеѓани во терористичкиот напад во Брисел биле на 70, односно 60-годишна возраст, терористот е убиен, се бараат помагачите
Двајца мажи на возраст од 70, односно 60 години се жртвите на терористичкиот напад во Брисел, а третиот кој е тешко ране и се наоѓа во болница, исто така има 70 години, јавуваат белгиските медиуми.
Белгиските медиуми го пренесуваат соопштение од шведското Министерство за надворешни работи во кое се вели дека 70-годишниот маж живеел во областа Стокхолм, а 60-годишниот живеел во странство. Кај него е пронајден швајцарски пасош, па можно е да имал двојно државјанство на Шведска и на Швајцарија.
Во нив пукал тунискиот државјанин Абдесалем Л., кој и покрај одлуката да го протераат од Белгија пред две години, илегално престојувал во земјата.
Тој ги следел жртвите кои излегле од таксито и потоа отворил оган од автоматско оружје. Третото лице тешко рането било таксист, по што напаѓачот побегнал.
Следеше потрага по него и безбедносната закана во Брисел беше подигната на највисоко ниво.
Во вторникот наутро, по дојава од сведок, полицијата го лоцирала во близина на кафуле во бриселската општина Шарбец. Полицијата интервенирала околу 7 часот и 30 минути, пукала и го ранила осомничениот, кој починал малку подоцна во болница.
Сега и официјално е потврдено дека се работи за лицето за кое државното обвинителство го наведува само името и првата буква од презимето – Абдесалем Л.
Федералното јавно обвинителство повеќе не исклучува можна поврзаност меѓу синоќешниот напад и конфликтот во Израел и Газа како што беше објавено вчера.