Агенцијата за храна и ветеринарство извршила серија инспекции во образовните институции во цела држава од почетокот на учебната година, при што три градинки и едно училиште добиле казни.

Според објавените информации, контролирани биле кујните на 91 градинка и 23 училишта при што било утврдено дека кај 9 градинки хигиената не била на задоволително ниво, а во една од нив персоналот немал соодветен лекарски преглед.

Кај училиштата, проблеми, главно со хигиената биле констатирани во пет кујни при што едно училиште било казнето, а донесени биле и пет решенија за отстранување на проблемите.

„Во две градинки, хигиената не била задоволителна во кујните, а една градинка немала спроведено задолжителен здравствен преглед на вработениот персонал во кујните. Парични казни изречени се за три градинки, и поради несоодветно чување, уништени се 24 килограми храна.

Од спроведените контроли во училиштата, незадоволителни услови констатирани се само во една училишна кујна. Отстапки во однос на добрата производствена и добра хигиенска пракса утврдени се во две кујни. Поради погрешно декларирање, уништени се 59 килограми храна“, информираат од Агенцијата.