Музичарот и поранешен сопруг на Памела Андерсон, Томи Ли, пред два дена беше обвинет за сексуална злоупотреба што се случила пред 20 години.

Неидентификувана жена поднела тужба против тапанарот на „Мотли кру“ (Mötley Crüe).

Како што таа тврди, Ли пред две децении „насилно ја допирал, ја бакнал и се обидел да ја принуди на орален секс“. Немилиот инцидент се случил, според тужбата, за време на 40-минутен лет, кој започнал кога Томи Ли и пилотот почнале да консумираат алкохол и кокаин.

– Во еден миг пилотот ме повика во кабината во која Томи Ли веќе беше со спуштени панталони. Се обидуваше да ме натера на орален секс и јас плачев. Немав каде да одам – ​​рекла жената која го тужи 61-годишниот музичар за сексуално насилство и душевна болка.

Томи Ли сѐ уште не ги коментирал наводите.