Перформансот „Бура и продор“ во режија на Теа Беговска произлезе од шестдневна работилница на Интернационалниот театарски фестивал „Скупи фестивал“, а премиерата на перформансот се одржа во рамките на фестивалот на 8 октомври.

Перформансот „Бура и продор“ се занимава исклучиво со актерската професија и со лични бури поврзани со актерството и театарот, прикажани преку разни драмски и комични ситуации, ставајќи акцент на изразувањето преку движење.

Во драматуршкиот опис на перформансот има театар, шест актери и еден телефон. Шест актери кои го чекаат својот повик. Чекајќи го повикот, секој од нив добива шанса да се соочи и да ја раскаже својата бура.

– „Бура и продор“ е перформанс кој говори за актерот, пред сѐ – човек кој бурно се носи и бори со своето време – стои во најавата на претставата.

Продуцент е Интернационалниот театарски фестивал „Скупи“, режијата е на Теа Беговска, а во перформансот играат актерите Илин Јовановски, Дениз Рустеми, Бојан Лазаров, Миа Кантарџиева Петровска, Тодор Стојковски и Дин Ибрахим.

Изведбата во КСП „Центар-Јадро“ во Скопје ќе се одржи на 31 октомври, со почеток во 20 часот. Бројот на посетители е ограничен на 60 гледачи.